قاراقانلی محمدعلی قدیانی[1] (مداح)

http://qaraqanli.blogfa.com/post-38.aspx

قاراقانين كولونگون كندینده، 1280 گونش ایلی مهرعلي قدیانی اوغلو محمدعلي دونيايا گؤز آچمیشدیر. كند مكتبخانالاريندا مکتبین بیتیریب اوخويوب يازماق اؤیرندی. شعر دئمه‌گي ائمه اطهار مدح­­لري ايله باشلادیغینا گؤره «مداح» تخلصون اؤزونه سئچدی. قيرخ ياشيندا گؤزلري­نين تامام ايشيقلارين الدن وئريب گؤرمز اولور اما سونرا ايسه ايشيق اؤرگي داهادا ايشيقلانير و «ضرير» تخلص ایله شعر دئمگی داوام ائدیر. قاراقانین بؤیوک شاعیری عومرونون سون ايگيرمي بئش ايليني «ایلدیرئیین» كندينده كئچيريب و 1352 گونش ایلی كرج­ده دونيادان گؤز یوموب قم­ دا وادي السلام مزاریستانيندا توپراقا تاپشیریلیر. بیر بؤیوک شاعیرین شعرلریندن بیر اؤرنک:



اؤگود[2]

غافیلا، بير آچگينان غفلت گؤزین اي دريغا گئچدي عمر نازنين

خواب غیفلتدن گؤز آچ بيرجه اويان اي عزيزیم ياتما كوچدو كاروان

گئتدي اول[3] كس كي دئيردي گئتمرم اولدو اول كس كي دئيردي اولمرم

حسرت ايله گئتدي بير كام آلمادي بير آدي قالدي نیشاني قالمادي

كيم تصرف ائيله‌دي گؤر ماليني؟ گئت او قبریستانه بير سور[4] حاليني

تير مرگه گؤر نه­ طوري توش اولوب قاره توپراق ايله هم آغوش اولوب

دار دونياده ائدردي ایفیتخار ايندي يولداشي اولوبدور مور و مار

نولدو[5] باخ گؤر اول جلال و طیمطراق بير كسي يوخ حاليني آلسين سراغ

ييغدي چوخ چوخ ملك و مال بي­حساب اولدو حمال مظالیم اي جناب

اؤزگه­ يه قالدي هامي جاه و جلال اؤزو اولدو حامل زر و بال

عورتينه صاحب اولدو اؤزگه‌لر اؤزگه­ يه قالدي تمام اول سيم و زر

اول عمارتلر كي سالدي زر نگار اؤزگه‌لر توتدو او قصر ايچره قرار

اي عزيزيم آچ گؤزون بيدار اول باخ گئدن يولداشينه هشيار اول

بيل كمينينده ياتيب گرگ اجل ها ياويقدير[6] ترك قيلسين ال به ال

گر سني مغرور ائديب دارالغرور آخرتدير، بيلگينن دارالسرور

بسدير اي «مداح» قيلما شور و شين تا نفس واردير چاغير سن يا حسين


آلت یازیلار

[1] - بو یازی دوکتور علی کمالی نین وارلیق مجله سینده یازدیقی «مداح» آدیندا مقاله دن خلاصه اولونوب.

[2] - نصیحت

[3] - او

[4] - سوروش

[5] - نه اولدو، نمه اولدو

[6] - یاخیندیر
+ يازار : حسین قاراقانلی یکشنبه 13 تیر1389